धक्कादायक ! सचिन तेंडुलकरच्या बॉडीगार्डची गोळी झाडून आत्महत्या

आय मिरर

सचिन तेंडुलकर यांच्या बॉडीगार्डने आत्महत्या केल्याची धक्कादायक घटना समोर आली आहे. स्वतःच्या डोक्यात गोळी झाडून घेत त्यांनी आत्महत्या केली. जामनेर शहरातील जळगाव रोडवरील गणपती नगरमध्ये वास्तव्यास असलेल्या प्रकाश गोविंदा कापडे (वय 37) यांनी राहत्या घरी डोक्यात गोळी झाडून घेत आत्महत्या केल्याची घटना घडली आहे.

प्रकाश कापडे हे SRPF मध्ये भरती झाले होते. त्यानंतर त्यांची पोस्टिंग होऊन ते मुंबई येथे सचिन तेंडुलकर यांचे बॉडीगार्ड म्हणून कर्तव्यावर होते. आठ दिवसांपासून कापडे मुंबई येथून जामनेर येथे आपल्या गणपती नगर येथील घरी आले होते. रात्री 1 वाजेच्या सुमारास प्रकाश कापडे यांनी राहत्या घरी डोक्यात गोळी झाडून घेत आत्महत्या केली. यावेळी घरातील सर्व झोपले होते. गोळीबाराचा आवाज आल्यानंतर घरातील लोक धावत आले तेव्हा प्रकाश हे रक्ताच्या थारोळ्यात पडलेले आढळले. घटनेची माहिती मिळताच जामनेर पोलीस स्टेशनचे पोलीस निरीक्षक किरण शिंदे आणि त्यांच्या सहकाऱ्यांनी घटनास्थळी धाव घेतली.

यानंतर प्रकाश कापडे यांचा मृतदेह शवविच्छेदनसाठी जामनेर शहरातील उपजिल्हा रुग्णालयात पाठवण्यात आला आहे. आत्महत्येचं कारण मात्र अद्याप समजू शकलेलं नाही . तपास सुरू असून त्यानंतर कारण स्पष्ट होईल असे पोलीस म्हणाले. त्यांच्या पश्चात आई, वडील, पत्नी आणि 2 मुलं असा परिवार आहे. या घटनेनं परिसरात एकच खळबळ उडाली आहे.