Baramati या कारणामुळे खांडजच्या मारुती रोमन यांचा त्या दोघांनी केला खून,मृतदेह हातपाय बांधून टाकला होता विहिरीत

आय मिरर 

मजुरी कामासाठी बाहेरुन आलेल्या महिलेकडे शरीर सुखाची मागणी केल्याचा राग मनात धरून बारामती तालुक्यातील खांडज येथील राऊतवस्ती परिसरातील मारुती साहेबराव रोमन या 58 वर्षीय पुरुषाचा डोक्यात दगड घालून खून करण्यात आलाय. यानंतर पुरावा नष्ट करण्यासाठी रोमन यांचा मृतदेह हातपाय बांधून तो विहिरीत फेकून देण्यात आला होता, या खूनाच गूढ माळेगाव पोलिसांनी उलघडवलं असून याप्रकरणी दोघांना अटक करण्यात आली आहे.

नवनाथ शिवाजी घोगरे वय 25 वर्षे रा. कार्ले भाजी लोणावळा ता. मावळ आणि अनिल गोविंद जाधव वय 35 वर्षे रा.आंबेवाडी ता. रोहा जि. रायगड अशी अटक करण्यात आलेल्या दोघांची नावे आहेत.

याबाबत पोलिसांनी दिलेली माहिती अशी की,बारामती तालुक्यातील खांडज येथे दि.7 मे रोजी सकाळी सात वाजण्याच्या सुमारास कांतीलाल सयाजी माने यांच्या विहिरीमध्ये खंडज राऊत वस्ती येथील मारुती साहेबराव रोमन यांचा मृतदेह आढळून आला होता. त्यांच्या डोक्याला आणि चेहऱ्यावर मार लागण्याच्या खुणा होत्या शिवाय त्याच्या मानेला साडी व दगड बांधलेला होता. या संदर्भात माळेगाव पोलीस ठाण्यात विजय मारुती रोमन रा.राऊतवस्ती खांडज यांच्या फिर्यादीवरून अज्ञात व्यक्ती विरोधात खूनाचा गुन्हा दाखल करण्यात आला होता. 

या प्रकरणातील आरोपींचा शोध घेण्यासाठी माळेगाव पोलीस ठाण्याचे प्रभारी अधिकारी सहाय्यक पोलीस निरीक्षक सचिन लोखंडे यांनी गुन्हे शोध पथक तसेच इतर पोलीस अंमलदार यांची दोन पथके तपास कामी रवाना केलेली होती.

या गुन्ह्याचा तपास सुरू असताना पोलिसांना खाबऱ्यामार्फत माहिती मिळाली होती की मारुती रोमन ही घटना घडणेपुर्वी खांडज गावात मजुरी कामासाठी बाहेरुन आलेल्या लोकांसोबत फिरताना निदर्शनास आला होता. त्यानंतर पोलिसांनी ज्या विहिरीमध्ये त्यांचा मृतदेह आढळला त्यापासून जवळच असलेल्या पालांवरील नवनाथ शिवाजी घोगरे आणि अनिल गोविंद जाधव यांच्याकडे मारुती रोमन यांच्याबाबत चौकशी केली. या दोघांनीही सुरुवातीला पोलिसांना उडवा उडवीची उत्तरे दिली.

मात्र या दोघांवर पोलिसांचा संशय बळावला होता. एवढी पोलिसांनी शकल माळेगाव पोलीस ठाण्याच्या पोलीस पथकातील महिला अंमलदार यांच्यामार्फत या दोघांच्याही कुटुंबातील महिलांकडे मारुती रोमन यांच्या बाबत चौकशी केली असता त्यांनी दिलेली उत्तरे आणि नवनाथ घोगरे व अनिल जाधव यांनी दिलेल्या उत्तरांमध्ये पोलिसांना विसंगती आढळून आली.

यानंतर वरील दोघेही पोलिसांपासून खरी माहिती लपवत असल्याची पोलिसांची खात्री पटली. पोलिसांनी सखोल चौकशी केली असता त्यांनी मारुती रोमन हा अधुन मधुन मजुरांचे खोपीवर येत जात होता, याच ओळखीतुन मारुती रोमन याने मजुरी काम करणारा अनिल जाधव याचे आईकडे शरीर सुखाचे मागणी केलेली होती, तो प्रकार त्या महिलेने तिच्या मुलाला सांगितला होता. याचा राग मनात धरून मारुती रोमन यांस विश्वासात घेवुन, परीसरातील निर्जन स्थळी नेवुन त्याच्या डोक्यात दगड मारून त्याचा खून करण्यात आला. 

मयताची ओळख पटु नये म्हणुन त्याची कपडे काढुन पुरावा नष्ट करण्याच्या उद्देशाने ती कपडे पेटवून देण्यात आली. मारुती रोमन यांचा मृतदेह काही कालावधी करिता त्याच परिसरातील उसाच्या शेतात लपवून ठेवण्यात आला आणि त्यानंतर रात्रीच्या अंधाराचा फायदा घेत मयत मारुती रोमन यांचे हातपाय बांधून त्यांचा मृतदेह पाण्याच्या वरती येऊ नये म्हणून साडीच्या साह्याने मोठ्या दगडाला बांधून तो विहिरीत टाकून देण्यात आल्याची कबुली या दोन्ही आरोपींनी माळेगाव पोलिसांना दिली आहे. याप्रकरणी या दोन्ही आरोपींना माळेगाव पोलिसांनी अटक केली असून माळेगाव पोलीस ठाण्याचे प्रभारी अधिकारी सहाय्यक पोलीस निरीक्षक सचिन लोखंडे यांच्या मार्गदर्शनाखाली पुढील अधिकचा तपास पोलीस उपनिरीक्षक तुषार भोर हे करीत आहेत.

सदरची कामगिरी पुणे ग्रामीण पोलीस अधीक्षक पंकज देशमुख, अपर पोलीस अधीक्षक गणेश बिरादार, उपविभागीय पोलीस अधिकारी डॉक्टर सुदर्शन राठोड,स्थानिक गुन्हे शाखेचे पोलीस निरीक्षक अविनाश शिळीमकर यांचे मार्गदर्शनाखाली माळेगाव पोलीस ठाणे प्रभारी अधिकारी सहाय्यक पोलीस निरीक्षक सचिन लोखंडे, गुन्हे शोध पथकाचे पोलीस उपनिरीक्षक देविदास साळवे, अमोल खटावकर, तुषार भोर, सहा.पोलीस उपनिरीक्षक संजय मोहीते,पोलीस हवालदार सादीक सय्यद, राहुल पांढरे, विजय वाघमोडे, महीला पोलीस हवालदार रुपाली धिवार, पोलीस नाईक ज्ञानेश्वर सानप, पोलीस कॉन्टेबल ज्ञानेश्वर मोरे, अमोल राऊत, अमोल वाघमारे, अमोल कोकरे, विकास राखुंडे, जालींदर बंडगर, सागर पवार, महीला पोलीस कॉन्टेबल सुनिता पाटील यांनी केली.