इंदापुरात इंडियन मेडिकल असोसिएशन आणि मेडिकोज असोसिएशन कडून हजारो वारकऱ्यांची तपासणी

आय मिरर 

जगद्गुरू संत तुकाराम महाराज यांच्या पालखी सोहळ्याचे औचित्य साधून इंडियन मेडिकल असोसिएशन (IMA) आणि इंदापूर मेडिकोज असोसिएशन यांच्या संयुक्त विद्यमाने गोखळी-तरंगवाडी (ता. इंदापूर) येथे भव्य मोफत आरोग्य शिबिराचे यशस्वी आयोजन करण्यात आले होते. या शिबिरामध्ये पालखी सोहळ्यातील हजारो वारकरी आणि स्थानिक रुग्णांची मोफत आरोग्य तपासणी करून त्यांना तज्ज्ञ डॉक्टरांकडून वैद्यकीय सल्ला व मोफत औषधोपचार देण्यात आला.

शरीरासोबतच मनाच्या आरोग्यासाठी भक्तीमार्ग सर्वश्रेष्ठ...

याप्रसंगी बोलताना इंदापूर 'आयएमए'चे अध्यक्ष डॉ. अभिजीत ठोंबरे यांनी वैद्यकीय क्षेत्रातील डॉक्टरांची भूमिका आणि भक्तिमार्गाचे महत्त्व यावर आपले विचार व्यक्त केले. ते म्हणाले, की "आम्ही डॉक्टर मानवी शरीरावर उपचार करतो, शरीराचे आजार बरे करतो. परंतु, आजच्या या धकाधकीच्या आणि ताणतणावाच्या जीवनात मनाला खरी शांतता आणि आत्मिक आनंद देणारा कोणती मार्ग असेल तर तो म्हणजे 'भक्तीमार्ग' होय.

हा भक्तीमार्ग जगात सर्वश्रेष्ठ आहे. महाराष्ट्राचे आध्यात्मिक आणि सांस्कृतिक वैभव असणाऱ्या जगद्गुरु संतश्रेष्ठ तुकाराम महाराज यांच्या पालखी सोहळ्याच्या निमित्ताने वारकऱ्यांची सेवा करणे, म्हणजेच वारकऱ्यांच्या रूपातील साक्षात विठ्ठलाची सेवा करण्यासारखे आहे, अशी आमची धारणा आहे."

तज्ज्ञ डॉक्टरांचा उत्स्फूर्त सहभाग...

या भव्य शिबिरात रुग्णसेवा आणि व्यवस्थापनात इंदापूर तालुक्यातील डॉक्टरांनी अत्यंत उत्स्फूर्तपणे सहभाग नोंदवला. यामध्ये प्रामुख्याने डॉ.सागर दोशी, डॉ.अमोल रासकर, डॉ.ऋषिकेश गार्डे, डॉ.अर्जुन नरुटे, डॉ.शिवाजीराव खबाले, डॉ.मिलिंद खाडे, डॉ.नामदेव गार्डे,डॉ.महेश रूपनवर, डॉ.अनिल शिर्के, डॉ.अनिल पेटकर, डॉ.सचिन बिचुकले, डॉ.रोहीदास थोरवे, डॉ.लक्ष्मण सपकळ, डॉ.उदय कुरुडकर,डॉ.मनोज शिंदे,डॉ.शैलेश घोगरे, डॉ.रोहित कांडलकर, डॉ.जी.आर.बनकर, डॉ.शीतल बोरा यासोबत महिला वैद्यकीय पथकात डॉ.कल्पना पाणबुडे,डॉ.अश्विनी ठोंबरे, डॉ.अनुजा दोशी, डॉ.कविता रूपनवर, डॉ.दीपाली तोरवे, डॉ.नुपूर कदम, डॉ.ज्योती नरुटे, डॉ.मनीषा बाबर, डॉ.आरती फडतरे, डॉ.सत्यवती घोगरे, डॉ.तेजश्री गार्डे, डॉ.दीप्ती मदने, डॉ.भारती कुरुडकर, डॉ.सुषमा सपकळ, डॉ.शुभांगी गार्डे यांनी वारकऱ्यांची आरोग्य तपासणी करून औषधोपचार केला.

हे शिबीर यशस्वी करण्यासाठी लेडीज विंगच्या अध्यक्षा डॉ. कल्पना खाडे आणि आयएमएचे सचिव डॉ. अतुल वणवे यांनी विशेष परिश्रम घेतले.हा सोहळा शिस्तबद्ध रीतीने पार पाडण्यासाठी आणि वारकऱ्यांच्या सुविधेसाठी स्थानिक पातळीवर विष्णुपंत मकर,माऊली वाघमोडे, लक्ष्मण हरणावळ, प्रदीप पोळ पोलीस पाटील, गोखळी याचे विशेष सहकार्य लाभले.

शिबिरात सहभागी झालेल्या सर्व डॉक्टरांचा वरील स्थानिक मान्यवरांच्या हस्ते गोखळी ग्रामस्थांच्या वतीने सन्मान करण्यात आला.या सर्व मान्यवरांच्या आणि डॉक्टरांच्या एकत्रित प्रयत्नांमुळे हे आरोग्य शिबिर अत्यंत यशस्वी झाले. डॉक्टरांच्या या तत्पर व आपुलकीच्या सेवेबद्दल हजारो वारकऱ्यांनी मनापासून समाधान व्यक्त करत कृतज्ञता व्यक्त केली.