मुख्यमंत्र्यांच्या वाढदिवसानिमित्त इंदापुरात पार पडलं रक्तदान शिबिर, शेकडो रक्तदात्यांचा सहभाग

आय मिरर 

राज्याचे मुख्यमंत्री देवेंद्र फडणवीस यांच्या वाढदिवसानिमित्त भारतीय जनता पार्टी कडून भव्य रक्तदान शिबिराचे आयोजन करण्यात आलं होतं. याचं उद्घाटन भाजपचे युवा नते प्रवीण माने आणि ज्येष्ठ नेते प्रदीप गारटकर यांच्या हस्ते पार पडलं. इंदापूर शहरातील राधाई हॉलमध्ये पार पडलेल्या या रक्तदान शिबिरात शेकडो रक्तदात्यांनी रक्तदान करीत मुख्यमंत्र्यांना दीर्घायुष्याच्या शुभेच्छा दिल्या.

या रक्तदान शिबिराला नागरिक, युवा कार्यकर्ते, महिला तसेच भारतीय जनता पक्षाच्या पदाधिकारी व कार्यकर्त्यांनी उत्स्फूर्त प्रतिसाद देत मोठ्या संख्येने सहभाग नोंदविला असून शेवटच्या आकडेवारीनुसार तब्बल २०१ बाटल्या रक्त संकलन करण्यात आले.

अनेक रक्तदात्यांनी स्वेच्छेने रक्तदान करून समाजाप्रती आपले कर्तव्य पार पाडले. "रक्त आहे…राष्ट्रशक्ती !" हा संदेश प्रत्यक्ष कृतीतून साकार करत वाढदिवसाचा उत्सव सामाजिक उपक्रमाच्या माध्यमातून साजरा करण्यात आल्याची प्रतिक्रिया युवा नेते प्रवीण माने यांनी दिली.

यावेळी देशाचे यशस्वी पंतप्रधान नरेंद्र मोदी यांचा अत्यंत प्रेरणादायी 'मन की बात' कार्यक्रम सर्व उपस्थितांनी एकत्रितपणे ऐकला. पंतप्रधानांनी मांडलेले राष्ट्रहित, सामाजिक सहभाग, जनजागृती आणि नागरिकांच्या कर्तव्य भावनेचे विचार उपस्थितांसाठी प्रेरणादायी ठरल्याची प्रतिक्रिया ज्येष्ठ नेते प्रदीप गारटकर यांनी दिली.

या कार्यक्रमाच्या निमित्ताने SIR (Special Intensive Revision) संदर्भात महत्त्वपूर्ण बैठकही आयोजित करण्यात आली. आगामी निवडणुकांच्या पार्श्वभूमीवर मतदार नोंदणी, पडताळणी, जनजागृती आणि बूथस्तरीय नियोजन याबाबत सविस्तर चर्चा करण्यात आली. SIR मोहिमेची प्रभावी अंमलबजावणी करण्यासाठी प्रदीप गारटकर व प्रविण माने यांनी कार्यकर्त्यांना मार्गदर्शन केले तसेच प्रत्येक पात्र मतदारापर्यंत पोहोचण्याचा निर्धार व्यक्त करण्यात आला.

यासह इंदापूर तालुका महिला मोर्चाच्या वतीनेही इंदापूर येथील जोतिबा मंदिर इंदापूर या ठिकाणी १०० झाडांचे वृक्षारोपण करण्यात आले.

या कार्यक्रम प्रसंगी भाजपचे पुणे जिल्हाध्यक्ष शेखर वढणे,आकाश कांबळे, मयूर पाटील, माऊली चवरे, अभिजित तांबिले, गजानन वाकसे, तानाजी थोरात, सदानंद शिरदाळे, बाबासाहेब चवरे, दत्तात्रय शेंडे, मंडल अध्यक्ष राम आसबे, किरण गाणबोटे, राजकुमार जठार, तेजस देवकाते, नगरसेवक अनिल पवार, संजय शिंदे, अतुल शेटे पाटील, वसीम बागवान, सतिश पांढरे, पांडुरंग मारकड, दत्तू वणवे, अभिजित घोगरे, महेंद्र काळे, शुभम शिंगाडे, गोरख आदलिंग, मयूर शिंदे, सचिन शिरसट, महिला मंडल अध्यक्ष माधुरी भराटे, योगिता यादव, सारिका पवार, रुपाली रणदिवे, अश्विनी अंकुश व पदाधिकारी, कार्यकर्ते उपस्थित होते.

हे रक्तदान शिबीर यशस्वी करण्यासाठी मुक्ताई ब्लड बँक इंदापूर, सर्व पदाधिकारी, कार्यकर्ते, स्वयंसेवक तसेच आयोजनासाठी परिश्रम घेतलेल्या प्रत्येक सहकाऱ्यांचे आयोजकांनी मनःपूर्वक आभार मानले.