अजितदादांच्या विमान अपघातातील ब्लॅक बॉक्सबाबत धक्कादायक माहिती; आता पुढे काय?

आय मिरर 

अजित पवार यांच्या विमान अपघाताला जवळपास तीन आठवडे पूर्ण होत आले आहेत. या अपघाताच्या प्राथमिक अहवालाची सर्वांनाच प्रतीक्षा आहे.

मात्र ज्या ब्लॅक्स बॉक्सच्या आधारे हा तपास होणार आहे, तो जळालेल्या अवस्थेत असल्यामुळं तपासात मर्यादा येत असल्याचं समोर आलं होतं. त्यासाठी हा ब्लॅक बॉक्स आता परदेशी पाठवण्याच्या हालचाली सुरु झाल्या आहेत. याचदरम्यान एअर एक्सीडेंट इन्वेस्टिगेशन ब्युरोने एक महत्वाची माहिती दिली आहे.

विमानातील दोन्ही रेकॉर्डरवर उच्च तापमानाचा (आगीचा) दुष्परिणाम झाला आहे. विमानातील दोन्ही रेकॉर्डर जास्त वेळ आगीत राहिल्यामुळे त्यावर गंभीर परिणाम झाला आहे. त्यामुळे विमानातील दोन्ही रेकॉर्डरमधील डेटा रिकव्हर करण्याचे काम सुरू आहेत.

ज्या देशात विमान बांधणी झाली आहे, त्या देशातील अधिकृत प्रतिनिधींकडून या प्रकरणी मदत मागितली आहे, अशी माहिती एअर एक्सीडेंट इन्वेस्टिगेशन ब्युरोने दिली आहे. त्यामुळे आता या ब्लॅक बॉक्सचं पुढे काय होणार, याकडे सर्वांचं लक्ष लागलं आहे. 

ब्लॅक बॉक्स म्हणजे नेमकं काय? 

प्रत्येक विमानाच्या ब्लॅक बॉक्समध्ये दोन अत्यंत महत्त्वाची उपकरणं असतात

1. फ्लाइट डेटा रेकॉर्डर (FDR)

•  हे उपकरण विमानाच्या तांत्रिक हालचालींची नोंद ठेवतं, जसं की,
• विमानाची गती (Speed)
• उंची (Altitude)
• इंजिनची स्थिती
• पायलटने दिलेले कंट्रोल इनपुट्स
• ऑटो-पायलट चालू/बंद स्थिती

अपघाताच्या काही सेकंदांआधी विमानामध्ये नेमकं काय झालं याचा अचूक डेटा यात साठवलेला असतो.

2. कॉकपिट व्हॉइस रेकॉर्डर (CVR)

• हा भाग पायलटांच्या कॉकपिटमधील आवाज रेकॉर्ड करतो, त्यामध्ये
• पायलट आणि सह-पायलट यांच्यातील संभाषण
• एअर ट्रॅफिक कंट्रोलसोबतचा (ATC) संवाद
• अलार्म्स, चेतावणीचे आवाज
• अपघाताआधीची गडबड, तणाव किंवा गोंधळ

ही माहिती अपघाताच्या मानवी चुकांची शक्यता तपासायला फार महत्त्वाची ठरते.

अजित पवारांचा विमान अपघातामध्ये मृत्यू...

अजित पवार यांचं विमान अपघातामध्ये निधन झालं. 28 जानेवारीला अजित पवार खाजगी विमानानेसकाळी मुंबईहून बारामतीकडे रवाना झाले होते. यावेळी बारामती विमानतळावर लँडिंगदरम्यान विमानाचा अपघात झाला होता. यामध्ये अजित पवारांसह 5 जणांचा मृत्यू झाला. अजित पवारांच्या अकाली मृत्यूमुळे राज्याच्या सर्वच स्तरात दुःखाची लाट उसळली.लाखो चाहते, समर्थक, सर्वपक्षीय नेते यांच्या उपस्थितीत 29 जानेवारीला अजित पवारांवर बारामतीच्या विद्या प्रतिष्ठानच्या मैदानात अंत्यसंस्कार करण्यात आले.