माझ्याकडे गँग आहे, पोरं कमरेला पिस्तूल लावून फिरतात ! तुला मारायला वेळ लागणार नाही

आय मिरर 

पुण्यातील पुरंदर तालुक्यातील जेजुरी एमआयडीसी मध्ये व्यावसायिकांचे अपहरण करून डोक्याला पिस्तूल लावून खंडणी मागितल्याचा प्रकार समोर आला आहे.याप्रकरणी जेजुरी पोलिसात शिवसेना शिंदे गटाच्या जेजुरी शहर युवासेना प्रमुखासह पाच जणांविरोधात खंडणी मागणे,अपहरण करणे यासह इतर आरोपांवरून गुन्हा दाखल करण्यात आला आहे. 

ओंकार नारायण जाधव रा.जेजुरी असंच गुन्हा दाखल झालेल्या शिंदे गटाच्या युवा सेना शहरप्रमुखाचं नाव आहे.त्याच्यासह हर्षल गरुड रा.बेलसर आणि त्यांचे अन्य साथीदार यांच्या विरोधात आता जेजुरी पोलीस ठाण्यात बजरंग हनुमंत पवार ,रा.पवारवाडी ,जेजुरी यांच्या तक्रारीवरून गुन्हा दाखल करण्यात आला आहे.

तुझा भंगार (स्क्रॅपचा) व्यवसाय आहे.माझ्याकडे गँग आहे.मुले कमरेला पिस्तूल लावून फिरतात. तुला मारायला वेळ लागणार नाही.अस म्हणत जेजुरीतील बजरंग हनुमंत पवार या व्यावसायिकाकडे यातील आरोपींनी 5 लाखाची खंडणी मागितली आणि दर महिला 50 हजार देण्यास सांगितलं असं तक्रारीत नमूद करण्यात आला आहे.

या बाबत दाखल करण्यात आलेल्या फिर्यादीनुसार प्रभारी पोलीस अधिकारी दीपक वाकचौरे यांनी दिलेली माहिती अशी की,बजरंग पवार हे शनिवारी ( दि.३) सायंकाळी ६ वाजण्याच्या सुमारास जेजुरीतून आपल्या दुचाकीवरून घरी निघालेले असताना त्यांच्या दुचाकीला हर्षल गरुड याने अडवले. तर ओंकार जाधव व इतरांनी त्यांना चार चाकी वाहनामध्ये ( फॉरचूनर एम एच १२एल झेड ९१९१) जबरदस्तीने बसवून मावडी पिंपरी गावच्या हद्दीतील एका शेतात नेले. तेथे डोक्याला पिस्तुल लावून दमदाटी व शिवीगाळ करत पाच लाख रुपयांची मागणी केली. तसेच मला माझी गॅंग सांभाळावी लागते. माझी पोरे कमरेला घोडे लावून फिरतात.तुला मारायला मला वेळ लागणार नाही. तुझे एमआयडीसी मध्ये वेस्टेज उचलण्याचा व्यवसाय आहे.मला आठ दिवसात पाच लाख रुपये द्यायचे आणि दर महिन्याला ओंकार भाऊला ५० हजार रुपये द्यायचे. अस म्हणत आठ दिवसांत पैसे देण्याची मागणी करत पुन्हा मोरगाव चौक जेजुरी येथे आणून सोडले.  

याबाबत जेजुरी पोलीस ठाण्यात भा.द.वि.कलम ३०८(२)१३७(२) १४०(२) ३५२,३५१ ,१८९(२)१९१(२)शस्त्र प्रतिबंधक कायदा ३(२५)अन्वये गुन्हा दाखल करण्यात आला असून पुढील तपास सहा.पोलीस निरीक्षक दीपक वाकचौरे करत आहेत . सर्व आरोपी फरार असून पोलीस त्यांचा शोध घेत आहेत. 

आरोपींवर यापूर्वी देखील गंभीर गुन्हे दाखल...

यातील आरोपींवर अशा प्रकारचे गंभीर स्वरूपातील पाच पेक्षा अधिक गुन्हे दाखल आहेत.तरीदेखील पोलीस प्रशासनाकडून त्यांच्यावर गंभीर कारवाई करण्यात आली नाही. त्याला राजकीय पाठबळ असल्यामुळे कोणीच काही करू शकत नाही अशी जेजुरीकर ग्रामस्थांमध्ये चर्चा ऐकायला मिळत आहे.दरम्यान सत्ताधारी पक्ष असलेल्या शिवसेने शिंदे गटाच्याच्या जेजुरीशहर युवा प्रमुखावर गुन्हा दाखल झाल्याने तालुक्यात खळबळ माजली असून उलटसुलट चर्चेला उधाण आले आहे.