वृत्त विशेष || केंद्रीय मंत्रिमंडळ विस्ताराची चर्चा सुरू झाली आहे. यात माजी मुख्यमंत्री नारायण राणे यांचे नाव मंत्रिपदासाठी चर्चेत आहे. राणे सोमवारी सायंकाळी मुंबईकडे रवाना झाले. पावसाळी अधिवेशनाच्या आधी केंद्रीय मंत्रिमंडळाचा विस्तार होणार आहे. याबाबत शुक्रवारी पंतप्रधान नरेंद्र मोदी,भाजपचे अध्यक्ष जे. पी. नड्डा आणि गृहमंत्री अमित शहा यांच्यात चर्चा झाली. सर्व मंत्रालयांचा आढावा घेऊन खातेबदल, तसेच मंत्रिमंडळ विस्तार करण्याचा निर्णय यात झाल्याचे समजते.
राजकीय जानकारांच्या मते माजी मुख्यमंत्री असलेल्या राणे यांना भाजपमध्ये प्रवेश केल्यानंतर केंद्रात मंत्रिपद दिले जाईल, असे संकेत होते.या विस्तारात ही संधी मिळण्याची शक्यता नाकारता येत नाही. मराठा नेते म्हणूनही त्यांची राज्यात ओळख आहे. मोठ्या संख्येने असलेल्या या समाजाचा विचार करता त्यांना संधी मिळण्याची शक्यता वर्तवली जात आहे.
नव्या विस्तारात काही नव्या चेहऱ्यांना संधी मिळण्याची शक्यता आहे. आता मंत्र्यांची संख्या ५४ आहे. ती ७९ पर्यंत जाऊ शकते. सध्या नितीन गडकरी, पियूष गोयल, प्रकाश जावडेकर, रावसाहेब दानवे, संजय धोत्रे, रामदास आठवले हे महाराष्ट्रातील नेते केंद्रीय मंत्रिमंडळात आहेत. नव्या विस्तारातील आणखी काहींना संधी मिळण्याची शक्यता आहे. यात सध्या नंदूरबारच्या खासदार डॉ. हिना गावित, साताऱ्याचे खासदार उदयनराजे, बीडच्या खासदार प्रीतम मुंडे, सांगलीचे संजय पाटील, विनय सहस्त्रबुद्धे यांच्यासोबतच नारायण राणे यांचेही नाव चर्चेत आहे.
